يوميات موظف مطحون بعد الغلاء المجنون

ارتفاع الاسعار المجنون بمناسبة يوم بعد يوم 
كان لينا لقاء مع موظف مطحون 

/
/
/

أنا يا اخواني شاب حزين
وقبل الحزن ده كنت .. مودرن
باكل واشرب أنا وعيالي
ومرتبي كان قيمة وسيما 
قامت الثورة .. بلدنا حتبقى عظيمة 
خلعنا رئيس وجالنا بداله رئيس جانتيه
سنة من حكمه .. بقت الثورة بربع جنيه 
خساره كبيره .. كنت فاكرها الشانزليزيه
وبصبرنا كده جالنا المنقذ
واخترناه اسم الله عليه
وعدنا وقالنا راح اعيشكم عيشة كريمة
بس اصبروا معايا سنتين
دنتوا الصفا والدفا والهنا
انتوا حبايبي ونور العين 
قولنا وماله .. مادام الصبر حيشفي بلدنا
قولنا وماله .. ما دام الصبر ده خير لولادنا
نصبر نصبر بدل الفرخة نجيب جملين؟
ومن وقتها ومرتبي كده جاله نزيف 
اجيبها يمين .. اجيبها شمال
جيبي خفيف
والاسعار طلعت في السما 
مرعب و مخيف
يا لطيف يا لطيف
كنا زمان قبل التعديل 
بناكل تونه ومعاها بلوبيف
تيجي دلوقتي تشوف اكلنا 
تلاقينا كلنا .. شركاء في رغيف
نبجي نشتكي نسمع أصوات 
خفوا التكاليف!؟
نسمع اعلامنا وتكذيبه .. استاذ تحريف
وردود أفعال كلها ريبة .. تخاريف تخاريف 
الواقع تايه يا اخوانا
كفياكوا تأليف 
في بلادي الحرة المحمية 
الناس تصنيف
صنف بيصرف ومنغنغ من غير تكليف
وصنف فاردلك جنحاته 
وعاملك فيها انه اليف
واصناف شقيانة وتعبانة
مستنظره وسط التسخيف
وأوامر عُليا بنسمعها
ترشيد .. تخفيف !؟
تخفيف ايه تاني يا اسيادنا
  ما خلاص وخلاص جيبنا نظيف!؟


:::


قلمي 
 أحمـــ سعيـــد